No jè stade une stemane serene par dût all’ambient Udinese. Le squadre no plui sigure de permanence dal sô alenadôr, Colantuono forsite cun t’un pîd in tal spogliatoio e cun chel altri zà fur de puarte, le societât cun le responsabilitât di čhapâ une decision in t’un moment che al somee un tra chêi plui delicâts in tai ultims ains. A meti in dificultât le squadre ančhe al pinsîr simpri plui neri di une salvece dute di guadagnâ: insome, simpri mancul sigurecis e une partide quasi impusibile al stadio Friuli cuintri le Rome, tierce fuarce dal campionât  che no piêrd da plui di un mês. 

Cheste le prospetive che vevin denant dai vôi i titolârs prime dall’inizii de partide. Al conventave un lamp di orgoglio, une reazion, alc che al varès monstrât che cheste Udinese no jè muarte ma ančhemò vive, che jè colade, ma che puès čhatâ le fuarce par tirasi su e partâ in somp chest sventurât an. 

E investe al prin timp no si è viodût nie. Une Rome strache, tornade de sconfitte a Madrid, no à čhatât nissune resistence. Nus àn metûts là, in te nestre metât di campo, libare di zujâ come che oreve. Dî grasie a Karnezis se in te prime part de partide al risultât sul mega-schermo dal stadio al segnave dome 0-1. Centrocampo e difese ferme sul prin goal, cun un passagjo di 25 metros točhât di Salah che al’è rivât sui pîs di Dzeko. Cence nissun caratar, cence nissun leader, bon di tirasi su le squadre e partase su le schene. 

Alc di plui al podeve jessi fât in tal second timp. Squadre aversarie une vore plui strache, plui spazios dulà lâ a cirî un goal, un scat di orgoglio. Masse pôc al pâl di Zapata e qualchi tîr che no l’à creât preocupazions al purtir de Rome. Rome che à savût siarà le partide in tal moment iust, cun t’une biele zujade di Florenzi, forsite masse facile, a sedi sincîrs. A nuje al’è conventât al prin goal di chest campionât di Bruno Fernandes¬, parce che le sconfite e jè rivade, e plui che une sconfite e jè someade une rese, e ančhe vergognose a dile dute. 

Fortune che al Carpi in tal scontro cul Frosinon al’à vint, se no, a che ore chi, si sarès cun mieç pît in Serie B, e le inerzie dute de bande di ches altris squadris. L’Udinese di masse timp e jè ferme in t’un limbo, e no si viôt a vuê cheste grande posibilitât di saltà fûr. Si podaresin partâ cent e passe resons par tentâ di fâ lûs su cheste dramatiche situazion: le societât, Colantuono, al clima strani che si creât in tai ultims timps.. dutis robis che àn une biel tôc di veretât, ma no bastin..

Ecco, par me cont, si puès cence nissune pore o fastidi dî cun serenitât che cheste Udinese jè sčharse. Atenzion: no dîs che ducj i zujadôrs son sčhars, ma che le squadre, al prodot total di chei zujadôrs e jè sčharse. Sčharse tecnicamentri, in te mentalitât, in te identitât. Se no si à bone uve no si rivarà mai a fâ bon vin. E al campionât al sarà all’ultim judis. Par cui o puès rabiami, parce che no viôt voe, cûr, amôr, ma im somp in somp o sai ben che cheste Udinese forsite plui di lì no puès rivâ. 

Le uniche robe che veramentri e displâs al’è viodi ducj chei suportêrs de curve furlane, le lor soference, e le pâs che no puedin čhatâ. Brutis scenis di viodi in television, ma se si è rivâts a chest pont alore le frature jè une vore impuartant. Starìn a viodi in tal prosieguo. Le sensazion jè che no bastarà le buine volontât di qualchi zujadôr o ančhe gambiâ alenador par dâ un sens a chest an. Alc al varà di saltâ fûr, ma al timp al sta par finî, e soredût, se no jè za finide, ančhe le pazienze di une int che no si merte un epilogo cussì.

 

Sezione: Blanc & Neri / Data: Lun 14 marzo 2016 alle 14:00
Autore: Tommaso Nin
vedi letture