Tra pečhât e orgoi

Ultime partide da l'an denant dal public furlan pe Udinese di Delneri: si spietavisi al spetacul de partide cun l'Atalanta, cun t'une Udinese zovine che sarès stade un aversari dificil par une squadre, le Sampdoria, metude in campo veramentri ben dal sô alenador. Si voleve al spetacul, e al spetacul, in un cert sens, l'è ancje rivât. Le Udinese à confermât le abitudine dai ultims timps: zujà grandis partidis in cjase par po' là a in trasfiarte e fà figuris indegnis: prin timp discret e dignitôs pe squadre furlane, che t'une spunto interessant di Zapata à fât subite clarece, fasint viodi a Muriel & CO cui ch'al comande al Friûl. Thereau l'à metût dentri al balon ch'al val l'1-0 e le sensazion che Delneri al campionât al vedi voe di zualu fin in te ultime partide, cence lassà pons cun facilitât a l'aversari. 

Al second timp l'è investe dute un'altre storie; se in altris ocasions l'ere stât al calo de Udinese a jessi plui che evident, domenie za dopo qualchi minût si è capît che al problema plui grand no si sarès clamât Schick o Muriel, ma Pinzani. Par une generose espulsion di De Paul, al zujadôr mancul trist de squadre, par un intervent dulà che jè evidente le consapevolece da l'argentin di jessi entrât mal e le volontât di no fâ mal a l'aversari, le Udinese si cjate in dis omps. Par paregjale le partide, le Sampdoria sfrute un rigôr che Muriel al segne cun tranquilitât. Le continuazion le cognossês. Danilo e Muriel in tai spogliatoios e une Udinese che sot di un omp no rischie al risultât.

Tant si è scrit e ancje di plui si è tabajât dal raptus di follie dal nestri cjapitani, Danilo, reo di ve čhapât pal cuel l'ex di turno, Muriel pe sô fieste dopo al goal. Son chei che cence esitazion an difindût al comportament dal nestri difensôr, chei che lu an criticât e chei che si son permettûs di dì che Muriel nol veve di jessi parât fur. Muriel l'à sbaliât. No parce che no si vedi di esultà quanc che si segne cuintri une ex-squadre, ce esagerazion! Ma le esultance di Muriel ere ben plui di chest: ere une evident provocazion. E come quanc che ti tocjn alc di impuartant, le to mae, i toi colôrs, Danilo no l'à podût no tignisi. Al sô gest l'è stât sbaliât, no l'è al mût iust di reagì, soredut denant di ducj i frûs che saràn stât in tal stadio. Sarès stât miôr rispuindi a le provocazion cul risultât, vincint le partide, ma cussì no l'è stât. 

Une sole robe positive podarès jessi tirade fur di chest brut episodi: al fat che zujà par cheste mae no l'è indiferent, che le Udinese rapresente alc di impuartant par chei che a le fin an di là in campo. Di chest si puès e si scugne tornà a partì.