Une modeste Udinese, un Pescara ancje plui piçul

Coventave une vitorie par dà une parvence di sens a chest campionât e le vitorie, un un pôc di cinismo e mentalitât e anche qualchi erôr di masse, jè rivade. L’aversari che l’Udinese čhatave su le sô strade l’ere al Pescara di Zeman, une squadre che cun buine pâs ancje dai sôi zujadôrs tornarà dopo dome un an in serie B. Insome, soredut dopo le biele prestazion cuintri le Juventus, dulà che le Udinese à mostrât che in tal sô stadio lis grandi squadris an di vendi cjare la pièl, le squadre di mister Delneri no podeve propite sbalià.

Cence Fofana e Felipe, l’alenadôr furlan l’à continuât cul stès sisteme di zûc: in difese al puest dal brasilian, Angella a l’à plantât le bandiere taliane denant di Karnezis; in tal mieç dal campo Jankto l’à čhapât le posizion che ere di Fofana, in t’une trio completât di Badu e Hallfredsson. Denant Zapata-Thereau-Perica.

In tal prin timp une Udinese cun pocjs ideis cun le bale in tai pîs jè rivade a meti le muse denant cun t’un goal di Zapata su azion di corner. Brâv al colombian a saltà libâr in te aree e a meti le bale in tal cjantòn. Cun le ecezion dal goal, le prestazion di Zapata e di dute le squadre in te prime metât de partide no jè stade tragiche, ma nancje ecezional. Al Pescara investe l’à metût in campo geometrie e zûc rasonât: si è fât viodi plui di qualchi volte de bandis di Karnezis, cence però meti al balon in te rêt e pensà di viergi le partide.

In tal second timp le Udinese e à un altre velocitât. No zue ben, ma zue miôr e cun t’un ritmo e une fisicitât, in tai prin 25’, che consegne le partide e i tre pons in tes mans di Delneri e dai sôi zujadôrs. Biele punizion che consegne a Jankto al balon dal 0-2 e ancjemò plui biele le azion che parte Thereau a sierà le partide. Acquisît al risultât, le squadre furlane à sbasât le intensitât, lassant al balòn a un Pescara che al continuave a zujà ma cence dà preocupazions a Karnezis prime, e Scuffet po’. Propite quanc che le partide someave inviasi a le fin l’è rivât al goal da l’ex Muntari, cun t’un tîr dulà che Scuffet al podeve e al scugnive fâ alc di plui. 

Chê di Pescara no sarà une prestazion che entrarà in te storie, ma siguramentri à portât qualchi pont in plui a une Udinese che scugne rivà a 40 pons, cumò che le salvece jè acquiside. Lis indicazions plui positivis par Delneri son i tre goi che le Udinese jè rivade a segnà, une raritât chest an, e le partide di Samir e Jankto, i miôrs tra i furlans. Al difensôr e al centrocampist son stât un lusôr in t’une domenie dulà che all’Adriatico l’è stât confermât al bas livèl tecnic di cheste Serie A.