Inter-Udinese: cronachis di une partide di "Premier League" italiane

Someave un match di Premier League, plui che di Serie A italiane le partide di sabide di sere cuintri l’Inter. Tantis ocasions di une bande e che altre, risultât incert e tante tante corse. Però lasse cul mâl di panse le sconfite: le Udinese veve le posibilitât di partâ in Friûl qualchi pont, ančhe dome un, in t’une partide, che cuintri le squadre di Mancini, vivace e viarte dal prin a l’ultim minût.  Le dos squadris rivavin al scontro di S. Siro cun ambizions une vore diviarsis. L’Inter veve di mostrâ, soredût a le Rome, di jessi ančhemò vive dopo l’1-0 di miercui stât a Genova, par pensâ a un tierč puest, chel che al vâl le Champions, che si faseve simpri plui lontan. Le Udinese, par cont sô e are rivade a Milàn su l’onde dall’entusiasmo pe biele e mertade vitorie in čhase par 2-1 su le Fiorentine. Une vore di int a S.Siro in t’une piacevole serade de fin di Avril spietave une partide spetacolose, che no varà fât de tecniche e dal tiki taka le protagoniste, ma in cui no son mančhadis emozions di une bande e di che altre.

De Canio al conferme al undis che al’à metût in crisi la Viola, in t’un scenari tattic in cui al nestri 3-5-2 si scontrave cuintri al 4-3-3 di Mancini. Le Udinese e và in campo cun le juste mentalitât e in tal prin quart di ore dal match e controle al campo cun relative facilitât. Pocs passagjos in te proprie metât di campo par cirî la denant i moviments di Zapata e di Badu e Bruno Fernandes a meti presion su le difese dall’Inter. Al goal di Thereau jè le rapresentazion di cheste Udinese firmade De Canio. Balon recuperât, e lancio daur dai difensôrs. Thereau al fâs al rest, cun t’une conclusion di prime e al volo da veri zujadôr, in tal cjantòn bas de puarte. Un mês e mieč fa, cun Colantuono, Thereau un goal cussì no lu varès fât e all’assist di Badu al sarès, cun buine probabilitât, finût dret in tes mans dal purtîr aversari. Ecco i segnai che le Udinese no jè par nuje le stesse.

Sarà stât al goal, ma di lì le Udinese si è sbasade forsite un pôc masse, cul lassâ all’Inter le iniziative, par limitasi a qualchi cuintri pît o azion manovrade, che devin ančhe le impression di podè fâ veramentri mâl. Le squadris an scomençat a slungjasi e le Udinese a jessi mancul aggressive. Icardi al’à metût in grave dificultât le difese furlane, cun moviments continuos incuintri al balon e in tai spazios. Dai sôi pîs al’è rivât all’assit par Jovetic, in t’une situazion in cui Danilo e Edelnilson podevin fâ di plui.

In tal second timp le Udinese e torne in campo cun plui coragjo, e voe di provâ a vincile, le partide. Edelnilson, buine le sô prestazion, e Fernades van dongje dal goal, ma čhatin su le lor strade pe paurte le manone di Handanović e le traviarse. Inter che investe zue dongje de nestre aree, cirînt dispès al goal, che nol rive dome grasie a lis paradis di Karnezis. Le partide čhate al moment decisiv quanc che le difese si fâs čhapâ in velocitât e un cross di Biabiany al sbàt sul cuarp di Jovetić; le bale si invie dentri in te rêt. 2-1 e Udinese che si bute in denant: al 95’ Zapata al puès paregjâ, ma Handanović al pare. Sul cuintripît Eder al parte al risultât sul 3-1. Puntegjo trist a le fin di une partide zujade discretamenti ben de squadre furlane. Le Udinese à patît al sfuarč di miercui cuintri le Fiorentine. Plui di qualchi zujadôr al someave un pôc strac. Mancjave brilantece di gjambe, soredût in te intensitât difensive. Al va det che le nestre squadre no à sfigurât e le sigurece jè che zujant cussì i risultâts e i ponts no podaràn che rivâ. Le preocupazion pe partide cul Torin jè le squalifiche di Zapata, che in tal l’ultim mês l’è stât di une impuartance fondamental. De Canio al savarà čhatâ une soluzion. Un ultim pinsîr: dai zujadôrs in campo nancje un italian. Cun nostalgie o pensi a chei timps in cui i zujadôrs de Udinese erin quasi ducj furlans: e chi si viarzarès un mond..