Inter e Rome, zero pons e un grand grop sul stomi

Une clasifiche che dà serenitât, un biel moment di forme, un attac che le met dentri cence masse dificultât, une difese no di prin livèl ma in migliorament: chestis lis certezis prime de soste di Nadâl. L’inizi da l’an de nestre Udinese l’è stât investe un di chei che no si puès gloti cun facilitât: dos partidis, ancje discretamenti ben zujadis, ma cun dome un goal fât, tre čhapâs e zero pons partâs fur. Ducj i suportêrs speravin in cûr lôr di mandâ čhase a čhav bas sia Inter che Rome, ma le realtât si è rivelade diferente e a metût ancjemò une volte le Udinese denant dai soi limis, denant di chel alc che nus mancje, ma che al covente a le squadre di Delneri par podè dî le sô ancje cuintri squadris cun sceltis tecnichis e ambizions di une altre categorie rispièt a lis nestris. 

Le note plui positive jè che le squadre à capît quai che podin jessi i struments di doprà par zujasi ogni partide cirint al massimo risultât, le vitorie. Cuintri Inter, soredût, e Rome no vìn assistût a partidis domenadis dome dal nestri aversari, ma, pensi al match che plui mi lasse al mâl di panse, chel cuintri le squadre di Pioli, i zujadôrs furlans an savût rispuindi colp par colp, metind in evidence lis debolecis dai zujadôrs aversaris, cun lis solitis zujadis dai tre denant e i moviments in tai spazios dai omps dal centrocampo: le Udinese no jè squadre che puès pensà , come le Juve, di creà pocjs ocasions di goal in te sperance di butalis dentri dutis. I omps di Nelneri an di zujà cun coragjo e fasi cori daur dai zujadôrs aversariis, e meti le partide sul livèl de intensitât e de fisicitât, che l’è unic mût par soperì a une inferioritât tecniche che si fâs plui evident cuintri formazions come le Rome.

Le partide cun l’Inter à lassât al public furlan che l’à iemplât le sô metât di stadio (ce tristece dilu) cun t’un grop che nol veve proprite voe di lâ jù: un grop che si è fermât sul stomi. Parce che si ere quasi a le fin dal prin timp e l’Inter no veve par nuje capît dulà che ere e ce che veve di fâ. L’Udinese stave metint in mostre une prestazion maiuscole, fate di corse e di che intensitât che no lasse timp a l’aversari par pensà. Question di un distrazion, de difese prime e di un no impeccabil Karnezis dopo e l’Inter cence mertà nuje à paregjât le partide. Al second timp a chel pont l’ere dût fur che prevedibil. L’Inter ere le stese squadre che cun le Lazio no à fât un tir par 50’ e po’ à fât tre goi vonde casuai sierânt le partide. E alore, propite quanc che le Udinese à calât i gîrs dal motôr l’è aumentât al posès di Icardi and CO, ma cence creà masse pericui. Jè stade le critiche atenzion de difese furlane a regalà a Perisic le glorie dal goal de vitorie, su azion di bale ferme. Le sconfite à brusât, parce che no mertade e vignude a le fin di une prestazion no perfete ma di bon livèl.

Ed ecco le partide dal riscât, de possibilitât dal riscàt, cuintri une Rome che no podeve permetisi di lassà pons in daur e cence Salah, impagnât cun le sô nazional in Coppa d’Africa. Le prestazion de squadre di Spalletti no jè stade superbe, ma le Udinese no à fât chel che al coventave par profità de condizion no perfete de squadre seconde in clasifiche. Masse approsimazion in tai moviments di difese e incapacitât di partà su le bale pal campo par lâ a imponi al zûc in te metât di campo averarsie. Al dato plui negativ l’è le facilitât cun cui le difese e al centrocampo son lâs in crisi su i moviments a tajà le difese di Nainggolan, cence rivà a difindi i spazios daur de schene e čhapà le misuris dai inseriments, tant che al goal l’è scaturît di une situazion simile.

Lis primis dos partidis dal gnûv an nus an fât viodi lis potenzialitâs che cheste Udinese puès esprimi -al prin timp cuintri l’Inter- ma ancje lis mancjanzis che, se no si fasin sintì cuintri lis piçulis, podin creà problemas cuintri squadris plui attrezzadis: pensi a le atenzion in tal cuviergi i spazios, in tal savesi difindi cun ducj i zujadôrs daur dal balòn cence impegnà Karnezis. Son robis che an di vignì cul timp, simpri che cheste squadre vedi le ambizion di mostrà alc di plui di une salvece. Empoli al sarà un prin esam impuartant, un esam che no si puès sbalià.