Dal biel prin timp di Empoli al Milan: “a Carnevale ogni scherzo vale”

Veve di jessi le partide dal riscat, ce che si è viodût a è stade une squadre brave a mieč. Brave a segnâ par prime, in cuintri-pîd, rivant in puarte cun doi biei passags in denant, cun t’une zuade in velocitât che a Udin chest an no si ere proprite viodude cussì dispès. Mancul brave a difindisi infìn tal ultim, cuand che al forcing de squadre di cjase si stave fasint plui fuart. Un pont di no butâ vie, chel madurât al Castellani di Empoli. No mi son displasudis les peraulis di Colantuono dopo le partide. Cun clarece al à sclarît le partide che veve di fâ le Udinese.

E are stade preparade, che di miercus, come une partide di zujâ sul cuintri-pît, par fâ mal a un Empoli che si meteve cun le bale tai pîs biel larg, par cirî di movi al balon e parà fûr i zujadôrs ‘furlans’. Le bale in tal prin timp le à vude dispès, quasi simpri le squadre di cjase. Udinese atente, basse, cence lâ a tentâ un pressing alt, che al à di jessi fât veramentri ben, soredût par meti in dificultât le tecniche di Maccarone & Co. Cheste strategie in tai prins 45 minûts e à partât risultâts. No pericui su azion par Karnezis –dome un biele punizion di Paredes (veramentri un  gran biel centrocampist, come conventarès a le squadre furlane)- e le prime possibilitât di segnâ, proprite su di une bale recuperade da Matos, che rivât ai 20 metros le à tocjade par Widmer, che cun t’un biel tîr al à cjatât le buine rispueste di Skorupski. Le partide le faseve all’Empoli, lis mior balis par segnâ lis à vudis le Udinese. E al simbul dal biel prin tìmp al è al goal di Zapata. Bale in profonditât, cence cjalâ, di Bruno Fernandes pe velocitât di Matos, che jentrât in aree le à pasade al Panteron, brâv a metile dentri. 1-0 e un prin timp di no discuti.

Le musiche però e gambie in tal second tìmp: le squadre someave studasi di minût in minût, simpri di pui, soredût dopo lis sostituzions di Colantuono. Lât fûr Matos, ancjemò no in tal plen de condizion fisiche, le Udinese è à pierdût le profonditât. Si sìn sbasâs simpri pui, masse. In ta l’ultim toc di partide l’Empoli al girave le bale dome in te nestre metà campo, cence che si rivâs a cjoli al balòn e paralu vie dai lôr pîs. Squadre visade sul rigôr, e salvade de fortune e grasie a le parade di Karnezis. Pocje atenziòn e al goal dai parons di cjase no si è fât spietâ, ma no l’è stât une sorprese. 1-1, partide finude e un pont par omp, che al à il savôr di une biele ocasiòn butade vie, pe Udinese.

Brave a mieč le squadre, bielis lis prestazions di Hallfredsson e Matos, che an fât viodi di podê jessi impuartànts pal prosieguo dal campionât. Si puès viodi le tace miege plene o miege vueide: le viôt miege plene, pai zujadôrs rivâs a Zenâr, pe atenziòn monstrade in tal prin timp. Cheste le strade, al zûc  al rivarà, mi auguri, ma cun cheste mentalitât. Cjâf al Milan, squadre in forme, cun biei zujadôrs, ma taticamenti mancul organizade dall’Empoli. Si podarà zujâ di plui, e cuintri le difese di Mihajlović, le Udinese, cun le velocitât e verticalitât di Empoli, e puès fa bèn. Al točhe a l’alenadôr savê dâ plui fiducie, e cjatâ, par da bon, chel equilibri infìn cumò sfiliât masse voltis. Un scherzut, al Milan, si podarès ancje falu, ancje parce che.. “a Carnevale ogni scherzo vale”.