Cronachis di une salvece: cussì no puès propite lâ

Domenie, pene gustât, prime de partide: o doi une cjalade a le clasifiche, e o viôt che le nestre Udinese e stà denant dal Genoa, di doi pons. Mi spieti une partide cun t’un grand equllibri, cun do squadris che ciraràn di no rischià masse, e provâ a colpì sui erôrs dai aversarios, cul scopo di rivâ a meti dongje un pontut daur chêl altri e costruî le salvece.

Ma ce che ai scognût viodi e jè stade dute un’altre partide. Le Udinese e someave cence identitât, une squadre che in qualchi mûd e spere di točhâ i 40 pons al prime pusibil, cence une strategie, cence une idee di partâ in denant in tes partidis di chi in somp dal campionât: magari e jè, ben platade, une idee, probabilmentri in tal cjaf da l’alenador, ma –ahimè- jo no le viôt e le squadre no rive a metile in pratiche. Di che atre bande al Genoa, une squadre che no rivave a vinci di un mês, come le Udinese, ma che à fàt viodi bielis prestazions; une squadre che stà ben, che sta cjatant des certezis, che identitât e compatece di zûc che no si è mai, ma proprite mai, podût mirà a Udin.

E le diferince a è stade lampante. Do squadris che in clasifiche e stàn a le stesse altece, ma cun prospetivis che van in direzions differentis. Cheste le prime robe che veramentri mi à fat pensâ, sin dal principi de partide: le mentalitât opposte di dos formazions che lotin pal stes obietiv. Gasperini cun t’un balon positiv, zujât in denant, su le corse di 11 zujadôrs che si movin cence pore in te metât di campo dai aversarios, par creâ ocasiòns, pai, paradis di Karnezis. Che di Colantuono une squadre sbasade da lis azions dal Genoa, che à cirût si zujâ in cuintri-pît, ma mal, cun masse pocs omps a seguî le azion e le bale che dispès e lave pierdude. Complete asence di manovre, se non altri dal moment in cui Guilherme no à plui cjatât libertât di zûc.

Se al prìn timp al lassave qualchi sperance (al prin goal in Italie dall’iracheno Alì Adnan), in tal secont le partide a no è gambiade, ma à partât al risultât plui natural e just. Tre lis imaginis che à podin ben fâ un sunt de trasfiarte di domenie:

-Al fal di man di Zapata e rigor dal paregjo. Al fal di Zapata al è stât le indegne conclusion di une indegne partide de ponte furlane. Al Pantheròn nol cjate le juste posizion, nol controle cun facilitât une bale, nol rive a dialogâ cun Thereau e chei altris. Dispès lassât di bessol, al à di jessi judât, lì in tal mieç de difese aversarie.

-Le difese de Udinese sul secont goal dal Genoa: ferme. Difensors che somein statuis. Karnezis al pare, e no un, ma doi zujadôrs dal Genoa e corìn su le bale par segnâ. Le difese? Ferme a cjalâ.

-Di Natale: Le sô partide e al rigor parât è jè le rapresentazion dal campionât de Udinese. Qualchi biel spunto, ma tristerie e destrece che mancjin propite in moments impuartants. Totò al cîr di movisi ancje ben, pe sô etât, ma denant de puarte no l’è chêl di un timp. Une ocasion, il rigor? Butade vie, come che fâs un poc dute le squadre in tal ultim toc di campionât, quanc che puès vinci, ma no si rive.

Domenie, prime di sere: Gervasoni al sivìle le fin de partide: ce che mi reste e jè dome une Udinese par nie atente, par nie concentrade, masse i passagjos sbaliâts, le balis paradis vie cence pensâ. Dificil a chest pont imaginâ une salvece facile, si scugnarâ cirile cul sang e muardile cui dinčh, e magari cun un altri alenador, mai dire mai!. E in te prosime partide al rive in Friûl un furlan, Del Neri, cul sô Verone; e sarà un altre grande batae.