Che rispueste de Udinese a la int furlane in te stemane dai cuarante agns dal taramòt

No bastin lis peraulis di ducj i dizionaris dal mond par definî le ingloriose e vergognose prestazion de Udinese cuintri al Torin. Val veramentri pôc pensâ a cemûd che sarès stade le partide se Matos vès segnât a le prime e uniche ocasion di dute le sô partide. Le quantitât di balis pierdudis, di contrasts lassâts ai aversarios e le flaperie cun cui le squadre jè entrade in campo tabae di bessole. Si varès di provâ a domandâ ai zujadôrs dal Torìn cemûd che al’è zujâ une partide di Serie A –no di III categorie- 11 vs 0. Cemûd che al’è podê pensâ doi seconds cun le bale in tai pîs cence nisun che ti ven a dâ fastidi: cemûd che al’è viergi une difese dome tirand le bale daur le linee, e rischiâ di fâ goal ogni volte.

Ma forsite al problema al’è che cheste squadre no à tirât nančhe fur une mentalitât di tierce categorie. Lì, se no rivin i pîs e rive le corse, le voe, le determinazion di no fâ passâ al aversari. Jè une question di dignitât, di partâ čhase l’onôr, di scelgi le “muart sul campo” par no fasi ridi proprite in tal nestri stadio. Sot chest pont di viste, forsite ančhe une squadre di III categorie podarès insegnâ alc ai nestris zujadôrs.

Mi plâs però pensâ che sabide 30 Avrîl 2016, Udinese-Torino 1-5 al sedi stât dome un episodio. Le memorie mi parte in daur mês par mês e mi fâs viodi le strane e incostante ande de squadre. Bielis partidis, magari cuintri squadris blasonadis, e dopo al crollo cuintri chês cuintri cui si scugne fâ ponts. Une squadre che no puès sapuartâ lis presions. Une squadre che somee studiâ, ma che al moment di fâ l’esam mančhe al bersaglio clamorosamenti.

Ere une partide decisive cuintri al Torin. Al risultât dal Palermo no puès che partâ altris preocupazions, che son le robe che mancul covente cumò. Dos partidis, che dopo le ultime prestazion fasin pore, ma tante. Bergamo al’è un campo dificil, pochis squadris e rivin a partâ vie le vitorie. Si scugnarà meti vie come minimo un pont, par dopo zujasi come in t’un duello le salvece cul Carpi. Al sarà facil pai zujadôrs savê ce fâ in te prosime partide: dut al contrari di ce che an fât cuintri le squadre di Ventura. A Bergamo no si à voe di viodi une squadre ferme, che stâ a čhalâ quanc che i zujadôrs aversarios e segnin. Une squadre solide, che tiredi fur caratar e dignitât.

Che i zujadôrs de Udinese zujedin une volte di plui par che int che reste in tal stadio infin ta l’ultim, a čhantâ ančhe denant a le piês partide da l’an. Int furlane par capisi, int generose ma plene di orgoi, dure fur ma dolč dentri. Int che in cheste stemane fasarà memorie di une tragedie. Une region dute si fermarà al 6 di Mai par no dismenteâ al taramot dal ’76. Taramot che al’è dispès puartât ad esempli dal cûr, de fuarce e dal spirt di sacrifici dal nestri popul. Une tragedie dulà che an pierdût la vite masse furlans, sot di che tiare che jè in tal stes timp amie, sûr ma ančhe, qualchi volte, destìn di muart. Furlans che magari e tignivin pe Udinese, par amôr de lôr tiare. Che qualchidun contedi ai forest che zuin in ta l’Udin ce che si farà memorie al 6 di Mai. Chest mi auguri in tal cûr, content di sei furlàn: che domenie le nestre squadre onoredi le memorie dal nestri popul, le memorie de int che à pierdût dut in chel maladet dì. Che le squadre zujedi pe int: parce che pensi che se si metarà dome un nie de nobiltât e grandece che al nestri popul, cun naturalece e umiltât, al’à fât viodi a cuarante agns fa, ecco no podarìn che alčâsi su a le fin de partide e sbati lis man cun ricognosince.