191 voltis grasie Totó!

GRASIE. Grasie par sedi stât un dai plui fuarts zujadôrs de Serie A dai ultims quindis agns. Grasie pal to incredibil talento. Grasie pai goi. Grasie pe zujadis che dome chei come te podevin regalanus. Grasie par vè vistût cun umiltât e afiêt le mae furlane de Udinese. Grasie par dût ce che tu nu as dât, come omp e come zujadôr, pes emozions e pe glorie che tu as partade al nom di cheste nestre squadre che jè le Udinese.

Veve di jessi le zornade di Di Natale: le zornade de sô ultime partide cun che mae che lu à partât a deventâ un dai zujadôrs che an segnât di plui in Serie A. Jè stade le zornade di Di Natale. Prime, di sabide, le ultime tabajade cun i gjornalists insieme al paròn Pozzo; domenie di sere le sfide cuintri al Carpi in tal gnûf stadi denant dal popul che al’à amât al sô čhapitani par plui di dis agns.

 Al’ere al lontan, si fâs par dî, 2004, e l’entourage furlan al rive a comprâ un dai miôr zujadôrs da l’Empoli di chel timp. Un attacant piçul, basùt, ma cun dos pîs par nuja mal, anzi. In Toscane al veve fât viodi bielis robis; tante velocitât di esecuzion, dribbling ma no masse goi, chei che invesite no mancjaràn in Friûl. Rivât cun le nomee di ‘bon zujadôr’, forsite no si sarès mai inimaginât come che sarès finude che aventure, forsite no si sarès spietât di saludâ une dì le Udinese come une leggende. Cheste jè une di ches bielis storis che al sport e al balon nus regalìn. Une storie cun t’un finâl di chei da premio Oscar.

 191 goi cun le mae blančhe e nere in mancul di 400 partidis. Numars di dût rispiêt, par un di chei che in te storie dal nestri campionât sòn rivâs a segnâ plui di 200 goal. Ančhemò mi visi i prins agns di Di Natale a Udìn. Al zuave su le fasse čhampe. Lui di une bande, di che altre Pepe  e in tal mieç Quagliarella. Dopo le rivât Sanchez e Totò al’à scugnût zujâ là denant, come un numar 9, ma cun le tecniche e le fantasie di un grand numar 10, cence mai pierdi la destrece di metile dentri, di ogni posizion, in dutis lis manieris, cun ducj doi i pîs. Sarà dificil pensâ a une Udinese cence Totò dopo le fieste di addio di iêr di sere.

 Fieste che par fortune nančhe Mazzoleni -ce arbitro sventurât- al’à podût rovinâ. Cun buine probabilitât cence chel rigor che si inventât cussì in t’un moment al Carpi nol varès partât vie plui di un pont. Fin lì ere dome le Udinese in campo. Ma al rigor e le espulsion di Thereau an gambiât le sorte de partide, ma no le fieste pal nestri čhapitani. E alore in tal second timp al sčhaldave al cûr viodi dute le int furlane no spietâ altri che chel moment: Di Natale che pe ultime volte al met su le fasse, e dentri su chel campo dulà che al’è stât protagonist. E par no fasi mančhâ nuja, proprite Mazzoleni no puès no meti dal sô e al regale a Totò al ultim goal, su rigor.

 Le pore ere che dopo lis storis dai ultims timps tra al zujadôr e le societât, l’addio al sarès stât un pôc frêt. Ma bisugne dilu: nonostante le grande ploe colade su Udin, o vin assistût all’ultim, lunc abrač tra un omp e une tiere, un popul che lu à adotât. E ches al restarà par simpri. Popul che al’à saludât ančhe Pasquale e Domizzi, doi che in tai ultims agns an fât le storie de squadre: Pasquale, l’eroe di Anfield, in che storiche partide cuintri al Liverpool dulà che al’à segnât un di chei goi che al contarà cence mai stracasi ai sôi nevodus; Domizzi, difensor trist ma simpri presint.

 Si siere un ciclo. Si čhale in denant. Si pense a le squadre di ricontruî par 8/11, si pense al’alenadôr. Ma, ančhe dome par une dì, no mi interese nuje di ce che sarà. Par un’ultime volte mi gjold i goi Di Natale, le sô tecniche, e chel special afiêt di un Friûl che par lui jè come une seconde čhase.