Sassuolo-Udinese: une sole partide, doi diferens progets a confronto

Lis confermis no son rivadis. Chel cul Sassuolo l’ere un test impuartant par misurà le crescite de Udinese fur dal Stadio Friuli. Se cul Milan si ere viodude une squadre atente, concentrade ma no corsare, che ere rivade a cjoli i tre pons cun fortune dopo une biele partide, a Reggio Emilia si saveve che al sarès coventât alc di plui cuintri une squadre zovine, veloce, che zue le bale cence pore e che suscitât le meravee di dute l’Italie. Sarès interesant meti dongje lis dos realtâs che an dât vite a le partide di domenie: doi progets che son siguramentri a doi livei diferènts. Al risultât sul campo l’è dome che une conseguence.

Quanc le Udinese di Guidolin, Sanchez e Di Natale si confermave le tiarce fuarce dal campionât, zujant cuintri squadris blasonadis come l’Arsenal l’entrade in te massime competizion europee, le Champions Leauge, al Sassuolo l’ere mancul che une squadre di province. Serie C, serie B, e dopo qualchi an serie A, cun t’une salvece che al prin an saveve di meracul. Un biel proget, progamazion e un alenador che no l’à pore di meti in campo lis sos ideis. Za in tal second an i risultâs mostrin al valor di une societât come che neroverde. L’aspiet che plui al fâs gjoldi dal ‘metodo Sassuolo’, jè le volontât di partà in denant zujadôrs talians, che al mostre come si puès fâ balon cul talento dal nestri paîs.

Di cuintri al fâs impresion viodi come le Udinese, se non altri in te prime squadre, vedi praticamenti dome zujadôrs stranirs e cence un proget tecnic di valôr. I tre ans passâs in te zonis basis de clasifiche confermin chest iudizi e al starà a Iachini cirî in qualchi maniere di gambiâ le storie. Le partide cul Sassuolo conferme il livel diferent e lis ambizions des dos squadris. Le costance dal Sassuolo, premiade da une vitorie, e le discontinuitât di une Udinese cence ritmo e personalitât, che continue a patì i problemas maduras in tal passât campionât. Bielis prestazions e partidis zujadis cence mentalitât e van e vegnin in tal spogliatoio di Iachini. Al covente timp par madurà personalitât, e Iachini al varà di speseà.

Le Udinese viodude domenie à durmît par quasi dute le partide lassânt il campo al Sassuolo. Al possès di di Francesco l’è plui strutturât di chel di Iachini. Le squadre neroverde zue un balon europeo, cun le volontât di lâ a metiin dificultât l’aversari lontan de sô puarte, di proponi balòn, di controlà bale e spazis. Al Sassuolo si è pojât su lis durmidis, specie il tal prin timp, de Udinese. Le partide di Francesco le à vinzude su lis fassis; de destre, Lirola al à fât viodi che al talento no l’à etât. Al zovin spagnûl di proprietât de Juventus l’à metût in crisi un Alì Adnan che za pe partide e i erôrs cun le Fiorentine forsite no varès di meti pît in campo. E al goal l’è rivât propite di che bande. Biele combinazion su le destre, Lirola al met in tal mieç una bale fuarte e insiodiose dulà che Defrel al poe in puarte. Di chel moment fin a l’ultim tôc de partide le Udinese fâs masse pôc, ancje par une Thereau, un De Paul e un Peneranda no in zornade. Emblematiche le decision di Iachini cun lis sostituzions. Fur lis pontis, dentri Zapata e Perica, che mostrin une volte di plui di jessi in forme e che an di zujà in te atese de rinascite di Thereau e dal zovin Peneranda.

No son vonde pe Udinese i ultim dîs minûs cun dos traviarsis. Masse pôc. Al covente plui coragjo, plui personalitât. Si à di lâ in campo par vinci ogni partide e che cul Sassuolo jè le immagine di ce che le Udinese, cjalant a le squadre di Di Francesco, ancjemò no jè e jè lontane di jessi. Tante le strade di fâ, magari cence butà par ajar masse ocasions o partidis, cence lassà pons impuartans daur de schene. E magari intant metinsi a le scuele de Sassuolo & Di Francesco company , fate di biel zûc e tante Italia, che mâl no puès fâ.