Cantîr Udinese: "lavori in corso"

Quatri a zero e si torne a Udin cun le amarece di une partence za biele che in salide. Quatri goal a le prime zornade fasin mâl e al mût cun cui son rivâs al fâ pensâ une volte di plui al valor di cheste squadre, e soredût de difese e dai zujadôrs che operin in chest ruolo. Iachini al varà ce lavorà, magari cun qualchi gnûv toc bon metût dongje da Bonato. Le impresion dopo al 4-0 cjapât a Rome jè che al mancje ancjemò alc a le squadre. Ma al mercato al sta par finî. Si scugne movisi, par no tornà a viodi un altri campionât sot al segno dal faliment.

Ma tabaìn de partide, di balon. Un prìn timp degn, cun t’une squadre ben metude in campo cuintri une Rome che no jè rivade a imponi a  le partide al ritmo, le intensitât e al züc par fâ mâl a le Udinese. Difese a cinc, squadre basse, daur de linee dal balòn. Rome che no cjate spazis e distancis par fâ balà le Udinese. Le note plui positive jè stade Samir. In tal prìn timp no l’ere facil zujâ di che bande. Bruno Peres e Salah son doi tra i plui svelts de Serie A. Le cjadene di sinistre di Iachini jè stade quasi perfete in tal tegni soredût Salah, un di chei someâs za in forme, in te prime metât de partide. Fofana al faseve schermo denant de difese, ma cun il balon tra i pïs nol puès impostâ. Prins 45 minûs che an viodût une Udinese cirî di fassi viodi de bandis di Vermaleen e Manolas, cun no biei risultâs. Zapata al à fât viodi buine capacitâ di tigni al balòn schene a le puarte, De Paul masse dispès al ere sol, cence soluzions, cun le squadre che faseve fature a cjapâ metros e che quanc che rivave al cross no partave avonde zujadôrs in te aree.

Dût somât une buine prestazion, viodüt che le altre squade ere le Rome, brave a tegni e fâ zirà le bale e meti presion a l’aversari biele alte. Ma dopo al thè dal interval le partide gambie; le squadris somein gambiadis. Destrece de Rome? Crisi de Udinese? Magari un pôc di dutis dos lis robis. No pensi che le Rome vedi cussì, dût in t’un moment, cjatât une velocitât di zûc masse superior. Le Rome e à continuât a fâ le sô partide. Le diference le an fate Perotti, veramentri un biel zujadôr, e une Udinese cence flât. I piès pericui son propite rivâs de fassis, dulà che le squadre di Spalletti cjatave simpri le superiotât e meteve cence fermasi balons in tal mieç. Di cuintri Iachini no l’à cjatât al mût di tigni alte le bale e costruì qualchi azion offensive. I prins doi goi de Rome rivin su doi rigors. Mancje qualchi mês a Nadâl, ma i regai di Danilo e Badu son di chei gros: un pôc di concentrazion in plui e le partide magari sarès stade mancul triste cun le Udinese. Altris doi goi rivin su durmidis de difese, completamentri lade in vacje cul passâ dai minûs.

Si sarès podût partâ cjase un pont? Mah, le Rome un goal prime o poi lu fâs. Par chest le me preocupazion e va a plui situazions. Ce che mi fâs veramentri pore jè le dificultât di cheste squadre in tal fâ su azions. Tre difensors e no un brav cui pîs. No une idee di zûc. No plui di tre passagjos di file cence un lancio in denant. Centrocampo che in te fase di possesso l’ere completamenti saltât dai difensors. Fofana, Halfredsson, Badu no mi son displasûs: an cirût di dâ equilibri. Conventarès un Lodi, a dâ geometrie, magari cun Fofana qualchi metro plui in denant. De Paul investe masse di bessol. Denant cence un schema o moviments par lâ in puarte o in tai spazis.

Iêr cu le bale in tai pîs dome “improvvisazione”. Ma cussì no si va lontan. Parce lâ in denant cu le difese a tre? Se tu as une difese che no sa movi un balon, miôr un difensor in mancul e un centrocampist di plui. Plui qualitât in tal mieç e denant, dulà che De Paul al podedi dialogâ cul balon. Condizion atletiche di registrà, ma par chel sarà decisive le partide di domenie cun l’Empoli. Cheste Udinese jè ancjemò un cantîr biel che viert: le sperance jè che si rivedi a fâ su alc ; alc che al stedi in pins e no vignès ju a le prime ploe, e il lavor di fâ nol mancje e nol mancjarà.