Une Udinese cence "pilota automatico"

Le vitorie dal Chievo in čhase sul Carpi rapresentave une ocasion di no pierdi pe Udinese. Le opportunitât di fâ tre ponts a Genova cuintri le Sampdoria e profumave di tranquile salvece e di une fin di campionât cence ches preocupazions dai ultims timps. Ma ‘due indizi non sono ancora una prova’ e cheste squadre jè colade simpri in chei problemas. Come une incapacitât di savê rispuindi a le clamade da l’alenador e dai suportêrs quanc cal covente, quanc che jè maturade une qualchi spiete, une sperance di mostrâ chêl alc di plui che in tai ultims doi, tre ains l’è simpri mančhât.

Soi plui che sigûr che De Canio sedi le persone juste par partâ in somp al campionât di chest an. Le Udinese viodude cul Sassuolo e soredût che cul Napoli ere dute une atre robe di chês di Colantuono. Ma, splâs dilu, no l’è ančjemò suficient. Cheste squadre no à al ‘pilota automatico’. No l’è suficient meti dentri le clâf, meti in moto, ingranâ le prime e spietâ al risultât. Tradôt: nol baste šielgi i omps, meti in campo i zujadôrs e pensâ che une volte date le direzion, le squadre rivedi a saltâ fûr di bessole.

Le Udinese di chest an no jè masse fuarte mentalmenti. Plui che lavorâ su le tecniche e su le tattiche, le impresiòn jè che si scugne lavorâ sul čhâv dai zujadôrs. Masse balaments di une partide in che altre. Al’è dificil rivâ a crodi che le squadre che à taponât le bale al Napoli no vedi fât un goal a le squadre di Montella, e che vedi lassât al zûc e al control de partide in tes mans dai aversarios par masse timp. Dal principi si è daûr a dî che cheste squadre e mančhe di tristerie. Si à di mangjâ mentalmenti lis squadris che si à denant, soredût se son formazions che lotin pe salvece come te.

Al paradòs al’è proprite che le Udinese à domenât al Napoli, ma è à fât le figure de pičule cuintri le Sampdoria. E alore no son masse soluzions. Al balon l’è semplič. Fâ un goal di plui dal tô aversario e sedi plui trist di lui par fâ sì di no čhapàlu. Chest l’obietiv: al mûd par rivai cun continuitât al à di čhatàlu le squadre…magari prime de ultime zornade.

Domenie che ven nus spiete al Chievo, squadre in forme, cun 44 ponts e tante voe di fâ ben. Partide di no čhapâ sôt gjambe, ma di frontâ cun serenitât, consapevolece e čhâv. Là che no rivin i pîs, l’à di rivâ al cûr, e là che nol rive al singul zujadôr e à di jessi dute une squadre. Cussì al risultât nol mančharà, e chêl, par nô, l’è le uniche robe che, forsite, cumò, e covente.