Une Udinese a "disturbo bipolare"

Tre sconfitis in tes primis tre partidis da l’an scomencin a deventà masse ancje pal public furlan. Si puès passà par sore a le debàcle cuintri l’Inter, risultât che nol dîs e nol fâs onôr a le prestazioni de squadre furlane. Si puès ancje acetâ di pierdi cuintri le Rome, ancje se par 1 a 0, ancje se si zujave in cjase, e ancje se le prestazioni jè stade no a le altece. Ma lassà al campo di Empoli cun zero pons e soredût dopo une prestazione anonime nol lasse indifferens. Le amarece si fâs dongje a le rabbie. Rabbie par une squadre che somee prometi plui di chel che rive po’ a mantignî: amarece pal fât che no sarà nancje chest, cun buine probabilitât e pâs di ducj, a l’an dal vêr riscât, de resurezion di une Udinese corsare, bule che no à pore di zujà ma che regale spetacûl, che à voe di lotà, che côr dal prin al 95’.

Parce che a ben pensà al problema l’è ancje che lis partidis de Udinese no nus emozionin plui di tant, no regalin spetacûl, nè zujadis di campions. In cheste direzion chest an alc di plui vin viodût rispièt a le mediocritât dai agns passâs, ma l’è ancjemò masse pôc. Se si fâs atenzion lis miôrs prestazions de squadre di Delneri son ancje le partidis che an regalât plui spetacûl: al prin timp cun l’Inter, al paregjo cul Torin, che di Bergamo cuintri l’Atalanta. Dutis partidis tra l’altri dulà che le diference no le an fate i vecjos, ma chei zovins di qualitât che son stât partâs a Udin cheste estât: Fofana e Jankto su ducj. 

A Empoli no vin viodût nè une grande nè un piçule Udinese: vìn viodût une squadre che jè stade buine di produsi un tîr in puarte in dute le partide, le biele conclusion al volo di Jankto e che à cjapât goal su di une azion partide di une rimesse lateral, a squadre schierade insome. Son osservazions che metin in lûs lis criticitâs di dute le squadre: une difese cence costance di rendiment, che no fâs mâl ma che forsite no fâs vonde ancje par vie di une produzion offensive che no puès jessi considerade suficient. Le Udinese segne masse pôc e ancje le percentual di conversion des ocasions jè masse basse. 

Al coventarà un’altri gambio di mentalitât? Chel di Empoli l’è stât dome un episodi? Le me idee jè che cheste squadre no rive a mantignì un cert standard di rendiment quanc che vegnin a mancja lis prestazions di certs zujadôrs. Quanc che Thereau, Fofana e al miôr Zapata an di cjapâ flât e zuin partidis al di sot de lôr possibilitâs le squadre no à lis alternativis, no à soluzions. Le qualitât complessive de squadre no jè a le altece da lis sperancis dai furlans. 
Pensi che viodarìn une Udinese che par dût al campionât varà un rendiment chel somearà a le storie cliniche di une persone cun t’un “disturbo bipolare”: grandis prestazions, magari qualchi vitorie impuartante, alternadis a partidis di bas livèl; grande eccitazion prime, e ancjemò plui grande depresion e delusion po’. Chest o pensi sarà le storie che si contarà di chi a le ultime partide cuintri a l’Inter, cun le sperance che cheste Udinese malade rivedi a curasi, e che grasie e a le terapie dal psicologo Delneri, i moments par gjoldi sedin plui di chei dulà vaì.