Timp di esams par cheste Udinese..

Tre pons in tes ultimis tre partidis: le biele gnove? Le continuitât a no jè in tal pierdi, ma il tal parejâ. Une constance in tal fâ qualchi pont che no si viodeve di tìmp. Cjalant le prestazion di domenie, si scugne cognoši a le squadre le braure di vê savût tegni bon al Milan in tal prin timp, ma le flaperie di vê consegnât in te seconde frazion le partide in tes mans de squadre aversarie. Cussì miercus a Empoli, cussì domenie, cuintri une formazion che rivave di une serie impuartante di vitoris. Al mert di vele fermade sul 1-1 al è di ricognoši. Si diseve de dople muse di cheste squadre. Un biel prin timp, buine mentalitât, une squadre che cîr di difinidisi cun ducj i sôi zujadôrs, unide, compate, par dopo cjatâ le vie dal goal. Goal che al è rivât, propite cul zujadôr che mancul si varès imaginât. Goal di Armero, 1-0, San Siro che al puès dome tasê denant al goal di un che ai timps dal Milan al ere dispès criticât.

Fin chi le partide perfete, miôr no si podeve pensâ. Ma le Udinese e fasarà i conts cun se stesse e soredût cun le fortune: al covente poc al Milan par gambiâ al destin de sô domenie. Si podeve siarâ le partide, lâ sul 0-2 e meti vie i tre pons. Chest al film che ducj e speravin di viodi; ma ad un goal butât vie, al è rivât al cuintri-pît dal Milan e le rêt di Niang. Di lì in poi dome Milan, e Udinese che come a Empoli si è sbasade par lassâ al zûc a le squadre aversarie.

Dismenteâ domenie e lâ in denant, cence vaî pai doi pons pierdùts, e continuâ su cheste strade, cun plui vôe e tristerie, par fâ pons, che coventin simpri, e par tornâ a vinci, magari propite in cjase. Plui di un mês fâ, cuintri l’Atalanta, le ultime prestazion che à partât tre pòns. Le squadre no jè le stese. Zujadôrs diferents, e une vore di catenaccio in pui, cirînt mancul bielece di zûc –che no ere nancje prime- e plui eficacitât.

Le squadre in chêst ultim mês par vedi studiât, vedi scoltât alch di plui al sô alenadôr. Cumò, in tes tre o quatri partidis che vignaràn, come a scuele, al sarà al timp dai esams par cheste Udinese. Quatri partidis: Bologna, Genoa, Verona, Frosinone, par capî le capacitâs e imaginâ dulà che chêst grup al puès rivâ. Quatri partidis impuartantis, parce che ca di un mês, cjalànt i risultâts, si podarà scomençà a dâ un prin judizi su chest campionât e sul lavor fât in chest an. Vinci o fâ no mancul di vot pons in quatri partidis al sarà garanzie di salvece: se si pierdarà, alore chest an al sarà un atri faliment.

Al di là dai risultâts che si varà di comentâ, le idee che un poc ducj e an in tal cjav a è plui profonde: tre campionâts che le Udinese no rive plui a esprimi né zûc ne risultâts come une volte. Si e fât al stadio? Ben. I Pozzo e an bês a tor par miege Europe? Ben.. ma ce che a Udin no si rive a viodi al è un progetto tecnico ch’al savedi tradusi investiments in balon, e a cheste robe si scugnarà, prime o poi, pensai par da bon.