Milan-Udinese: une vitorie pe continuitât

Tre pons che rivin a le fin di une partide cence masse emozions. Cuintri al Milan si zujave dopo le soste de nazional, che varès podût rompi al ritmo dal campionât pene scomençât. E investe cheste Udinese no à fat al pas plui lung de gjambe; Iachini, dopo ve metût in campo al 4-3-1-2 dome in te amichevule cuintri al Lubjana, l’à presentât le squadre cun chest modulo a Milano, al Meazza cuintri al Milan di Montella. Conferamde le difese che si ere discretamentri comportade cuintri a l’Empoli, cun l’uniche sostituzion di Samir, che l’à lassât al puest ad Armero. A centrocampo Kums, in tal mieç come metronomo dal zûc de squadre pensade di Iachini, cun Badu e Hallfredsson a tigni balons e lâ in pronfonditât. De Paul e le sô fantasie daur di Zapata e Thereau.

Udinese che no varà emozionât prodòt un gran zûc o regalât chel spetacûl che di timp no si viôt ne a Udin ma nancje in cjase dal Milan. Ordin, sbaliâ mancul pusibil, cirî al massimo risultât cul minimo rischio. E le Udinese di iêr no si puès dî che vedi passât masse pericui. Karnezis al podarà contà di ve vivût 90’ di pâs, cence che doi o tre miracui che scugne fâ ogni domenie par partâ fur qualchi pont. Insome, une prestazion difensive discrete, che fâs ben sperà pe partidis che an a vignì. Pochis lis ocasions ancje pe squadre furlane, che si è fate viodi no dispès de bandis da l’enfant prodige Gigi Donnarumma.

Schemas di attac sui quai in stemane si podarà lavorà, cun le serenitât che però rive dai tre pons madurâs in tai ultims lamps di partide. E ancje grasie al zovin Perica, che cun t’une pocje di fortune al’à cjatât al goal de vitorie. Iachini l’à indovenâde le sostituzion iuste. L’à monstrât di no vè pore di scometi su di un zovin e pe seconde volte l’à vût reson lui. Sperin che al vedi reson ancjemò par chei trentequatri pons che mancjin pe salvece che chest an e à di rivâ cun une gnove mentalitât, cui risultât e cun t’un zûc che plan plan al gambie. Widmer, terzin, al metarà mancul balis in tal mieç, ma al varà le ocasion di migliorà quanc che si à di difindi: al centrocampo al’è forsite al repart che al puès e al scugne dâ chel alc in plui. No saràn rivâs zujadôrs spietâs, ma Kums, cun lis personis iustis di une bande e di che altre al metarà in dificultât plui di qualchi difese. E alore al sarà plui facil par De Paul e Thereau cjatâ l’ultim pasagjo, in te atese di Zapata, un diesel che si spere prime o poi al entredi in condizion.

Iachini al’à vinzût dos partidis, cuintri Empoli e Milan; pons che son ossigeno par une squadre a cui covente sigurece e constance in tal tirà su pons un daur chel altri. Al ven un mês impurtant prime de gnove soste pe nazional. Partidis di preparà cun concentrazion e voe di fâ sì che al stadio Friuli al tornedi a jessi un campo dulà che nisun al puès zujà cun facilitât. Peraule al campo alore, dulà che domenie che ven al rivarà al Chievo di Maran: cjatarà le Udinese le vitorie de continuitât?