L'Udin e al sô circul malât: covente plui di une scosse!

Si varês voe di vaî dopo le partide di no crodi di domenie. Che i zuijadôrs a vèsin ancjemò denant dai vôi i quatri goi de Juventus, no ere robe dificile di capî. A ce sono conventàdis lis sigurazions di Colantuono sul lavôr de squadre vie pe stemane, su le determinazion di gambiâ une volte par simpri le sorte di chest plui che tormentât campionât? Si scugne jessi sclets. Cussì no si puès lâ in denant, ma no dome pai suportêrs che simpri a van daûr de squadre, ancje quanc ca no meritarès; un campionât zujât in cheste meniere, su e jù, vincint e piardint, cence continuitât o capacitât di tegni bon e construî su ce che di biel si è fat le domenie prime, nol covente a nissun.

Parcè no rivâ a no piardi par plui di tre partidis, parcè no rivâ a fâ zujâ le stese formazion par plui di une domenie, parcè fâ simpri i stes erôrs? Se une volte non fasin goal le pontis, che dopo e sarà le difese a fâ vignî di vaî. Se le pontis e fasin al lôr e le difese e zue degnementri, alore al sarà al portîr a decidi le partide. Se dopo come in te ultime trasfiarte si metin insieme dutis che robis (Thereau masse bon denant di Sorrentino, Perica invisibil; un centrocampo cence personalitât e sigurece di no piardile, le bale e di fasi cori daûr di chei altris; une difese che no merte di jessi nancje nomenade; Karnezis fûr forme, a chest pont o fasarès zujâ Meret) no si puès che cjapâ quatri scufiots di une squadre come al Palermo, seromai une concorrente pe salvece; si scugne dilu, si scugne tabajâ di salvece, ancje se al displâs; no erin chestis lis promessis de squadre, de societât al principi di chest sventurât an.

Al risultât al fâs pôre. Se si cjalin lis statistichis prime di lei 4-1, e ven le idee di une partide equilibrade, anzi, di une Udinese ancje un pôc superiôr. Ma le facilitât cun cui al Palermo al entrave in te nestre aree, fasint crodi di podê fâ goal, le facilitât cun cui le pontis aversaris si cjatavin dibessôl denant di Karnezis a sberlin plui fuart che mai e a tabain plui che no i numars. Le Udinese no è une squadre che vedi compatece. In tal campo no si zue come une squadre, no si è unîs; no si judisi, o se si lu fâs, lu si fâs mâl. Magari e jè le volontât, ma non si rive a tradusile in ponts, in prestazions, in continuitât.

Alc si scugne fâ. Ancje gambiâ Colantuono, no par condanâ o meti al rogo le so braure, ma par dâ une sacodade a le squadre, ai zujadôrs, cirî un gnûv equilibri, une gnove prospetive: parce che mi par che le Udinese sedi entrade in un circul malât, in cui al stes alenadôr al è dentri fin insomp.