Friûl in fieste! Jè nassude une gnove Udinese!

Trê di Avrìl. Sarà un dî che al jentrarà in te storie. Fieste de patrie dal Friûl, e Udinese che mande čhase le seconde fuarce dal campionât, al Napoli, cun t’une prestazion quasi perfete. Cheste jè le squadre che la int e spietave di masse timp. Cheste le mentalitât che si spietavisi di une squadre che masse voltis jè someade jessi cence anime. Se varès di čhatâ une definizion pe biele vitorie cul Napoli, o scrivarès che jè stade une vitorie furlane. Le piçule squadre de province, come al nestri Friûl, che cul sacrifici e al lavôr, daûr le direzion di De Canio, e à fât viodi di vê fuarce, personalitât.  Une Udinese che à metût in campo corse, tristerie, discipline e grûp. No jè stade le vitorie de societât, o di De Canio e dai zujadôrs. Jè stade le vitorie de squadre.

Si puès e si scugne dilu: finalmentri vìn ammirât une squadre di balon, e no un insieme di zujadôrs metûts in campo cence ideis claris. Ce che si sperave di vê viodût cuintri al Sassuolo al à čhatât le sô rispueste –e ce rispueste!- cuintri al Napoli. Le nestre Udinese à vût le partide in man dal principi a le fin, e di minût in minût e aumentave le consapevolece che chê di iêr e sarès stade une partide come nissune zujade chest an. Biele di viodi, efficac in tal zûc, amade da la int. I furlans an spietât, ma la miôr partide jè rivade propite in tal dî de fieste de nestre tiare.

De Canio al à savût creâ lis condizions par fâ vignì fûr lis qualitâs di ogni zujadôr. Al à domandât robis semplicis e il risultât al tabae di bessôl. Difese attente, puntaul e triste in tai intervents. No à lassât spazis ai zujadôrs d’atàc dal Napoli par podê in libertât pontâ le puarte di Karnezis. Centrocampo le miôr rivelazion. Equilibri e tecniche cun Kuzmanovic, corse di Badu e Armero, fantasie di Fernandes e talento di Widmer, chel che al à fât le diference. Denant Thereau al côr cun plui čhâf, par podê jessì plui lucit quanc che si à di butale dentri. Zapata al à fât ce che al’à di fâ, nie di pui. Metisi là denant, partâ su le squadre e pontâ le puarte aversarie. Trê goal, al prìn su rigôr, al secont nassût su un erôr di Gabriel, ma si scugne dî brave a le squadre in tal pressing: sul cross di Zapata quatri e arin i zujadôrs furlan in te aree a cirî al goal, e chest al’è segno di concentrazion. Il goal di Therau, al plui biel, al à siarât le partide.

No si faseve cussì fieste al stadio Friuli di masse timp. Ma le fieste plui grande e sarà che de salvece. Cun cheste intensitât al somee un obietif a le man. Al starà a le braure de squadre no molâ une partide, un contrast, e fa chês dos o trê vitoris che coventin. Un pinsîr al vâ a chel che al varès podût jessi al campionât de squadre furlane. Magari cun 10/12 ponts in pui si sarès cumò a scrivi di altri. Al covente a pôc pensâ cui ‘se’ e cui ‘ma’. Čhalìn a domenie che ven; le partide cuintri la Sampdoria e sarà un test impuartant par misurâ le maturitât di cheste Udinese.

Varino al plasê di viodi di Natale cuintri le squadre di Montella? Le sensazion jè che le storie d’amor tra il zujadôr di Napoli e le squadre furlane sedi rivade in somp. Ogni robe prime o po’ e à di finî. Pecjat par come si è metude le situazion. De Canio al’à fât dome al sô lavôr, no l’à colpis: al displâs, ma prime e ven le squadre, le salvece, e di Natale, pe persone che jè e jè stade, lu capirà.