Feliz Navidad?! Sarà un Nadâl pasât?

Une Udinese in tal segno dal numar 24. 24 come i pons in te sachete de squadre furlane da l’inizi dal campionât a lis ultimis partidis de prime metât de stagjon. 24 come i goi metûs a segno da Thereau & CO, 24 come i balons che Karnezis l’à scugnût tirà su dentri le proprie puarte, par une diference tra goi fâts e subît pari a zero. Tabajant di numars le salvece chest an jè ben che prenotade. A meno di clamorosis crisis de squadre o di Delneri ancje al prosim an podarìn viodin le Udinese in te massime serie. No soi scaramantic e sai che sin dome a metât campionât, ma le impresion jè che le squadre vedi cjatât une sô parvence di identitât, un sô equilibri, des soluzions e des sigurecis che rive cun facilitât a meti in campo e che stan partànt risultâs. 

Par une squadre, che dai Pozzo, che vedi le ambizion di fa alc in plui di une semplice salvece, che nol significhe Europe -sedi clâr, le squadre pe Europe no jè, nancje lontanamentri-, ma stabilisi cun un bon numar di pons, 50 amancul, in te bande sinistre de clasifiche, al sarà fondamental tignì une diference tra goi fâts e subîs positive; i pons partâs cjase saràn alore plui di chei lassâs pe strade, cun buine pâs e soddisfazion dai suportêrs furlans e di dût un ambient. Chest al sarès al miôr mût par pensà po’ a costruì une rose future a l’insegne de qualitât.

Ma no stìn a cori masse. Come dite le strade jè lungje, anche se al distàc di squardris come Crotone, Palermo e Pescara l’è rassicurant. Le quote salvece sarà basse. Un reson in plui par podè concentrà le atenzion su lis prestazions; une clasifiche cussì no puès che partà che serenitât che fâs lavorà ben, che permettarà a Delneri di perfezionà le sô Udinese, cun magari qualchi gnûv zujadôr che le societât podarès fâ cjatâ a l’alenadôr furlan sot da l’arbur di Nadâl. 

Le vitorie di domenie cuintri al modest Crotone à fât viodi lis potenzialitâs dai zujadôrs furlans. I goi son vignûs dai pîs di chei che Delneri l’à savût valorizà e fâ esprimi in tes lôr masimis possibilitâs. Jankto, assist man sul prin goal di Thereau, che cun Fofana in tal mieç al sta fasint viodi ce che al vâl; Zapata, che cun t’une sô tipiche azion fisiche l’à partât le bale infin te aree par passale a Thereau, che cun le fredece e le sigurece dal campion le à poade in tal cjantòn; Thereau, che cun Delneri l’à segnât za siet voltis. Monsieur Cyril l’à cjapât par man le Udinese, cun le volontât di meti in mostre i sôi numars e fâ divertì al public dal Friûl, e lis statistichis stan dant reson al numar 77.  

Ingredients par un seren e bon Nadâl son ducj: al panettòn furlan l’è quasi pront.
Coventarès, come che si dîs, ‘la ciliegina sul panettone'; chê podarès rivà za ca di qualchi dî, cuintri le Sampdoria di Gianpaolo, squadre pericolose, che zue ben ma no rive a concretizà. Une biele partide, ordenade cence rischià daur, e cun ripartencis in cuintripît e velocitât, podarà regalà al miôr Nadâl blanc e neri dai ultims agns, e cun t'un alendôr furlan in panchine: no spietin altri.