Cence difese!

Un titul che in tes intenzions di chel che lu a scrît che al varès di dî dût a ancje alc di plui. Parce che al fâs impresion viodi tombolâ in cheste maniere le squadre furlane, e propite in che sere che veve di jessi le sere dal riscât. De fin dal campionât stât le int furlane spietave che rivincite e chel orgoi che al varès parât vie lis poris e le memoris di une squadre che, par vie di alenador e zujadôrs, no si are mostrade a le altece de storie e dal nom de Udinese. E dome par chestis considerazions le squadre jè cence difesis. Le reazion de curve Nord a le fin de partide tabae par ducj. Podeve jessi le partide de maturitât? Podeve jessi le partide de fiducie. Je stade le partide de confermis, in tal ben ma ancje in tal mal.

Iachini a le sô prime partide vere al Friuli al mêt in campo un 3-5-2 cun lis unichis novitas di De Paul e Fofana a dâ un altri ritmo e livel tecnic in tal mieç. Pal rest i zujadôrs son chei da l’an stât. Le Udinese sin dai prins minûs cîr di dâ intensitât cuintri une squadre cun cui si scugne fâ pesâ le categorie di diference. Ma chest al sucêt dome in all’inizi dal prin timp. Al miôr de Udinese? De Paul. L’ex zujadôr dal Valencia l’è simpri in tal zûc de squadre furlane e al tocje une vore di balons. Al’è dificil partai vie le bale. Grasie a lui e a lis sô iniziativis le Udinese prove a meti in pinsîr al zovin ma brao portîr de squadre de Liguria. E l’1-0 al nàs di un tîr dal numar 10, che al cjate le deviazion decisive dal difensôr dal Spezia. Di chist moment le partide de Udinese sarà segnade pe confusion e le incapacitât di creâ masse problemas a le difese ligure.

Doi i miracui di Karnezis che dopo l’1-0 e salvin le Udinese dal paregjo. Nie puès investe fâ al numar 1 furlan su une confusion in te aree dulà che al nàs al goal da l’1-1. Ma al’è al 1-2 che al fâs preocupâ. Difese batude cun un triangul elementar e tîr in tal cjanton de puarte. Cence difesis..o miôr, cence difese! Cheste le note allarmante de partide di sabide di sere.

Second timp che al viôt al rigor di Zapata; le int a l’erôr de ponte di cjase no sâ se ridi o vaî. Goal mangjât e in tal gïr di qualchi minût al rive al 1-3, cun le difese ancje cheste volte colpevule. Le squadre di Iachini cîr le scosse, cun lis sostituzions di Halfredsson, Jankto e Peneranda. Nol rive al paregjo, ma dome al goal di cjâf di Zapata. Tre minûs di recupero e vitorie allo Spezia, che passe al turno e mande fûr de coppa Italia l’Udinese.

Cence difesis e cence difese. Denant alc si è viodût, daur Iachini al’à fât zujà chei da l’an stât e i risultâs no son gambiâs. Herteaux cence masse voe, Danilo che al varès di fâ le diference cun le personalitât, Felipe anonim. Tre che no dan sigurece e che balin ai prins pericui. Sperìn in Angella e magari ancje in t’une difese a quatri. Fofana al puès fâ ben, De Paul un talento, Zapata al varès di alçà lis percentuals di realizazion; un goal ogni sis tîrs l’è masse pôc.

Le consolazion jè che sin ancjemò a metât avòst; le delusion plui grande jè le incapacitât de squadre di tirà fûr personalitât quanc che convente. Sot cul lavor di Iachini, parce che sabide che vèn all’Olimpico si zujarà cuintri le Rome, e cheste sarà partide vere, le prime dal gnûv campionât, magari cun t’un Thereau in plui de nestre bande, che però l'è simpri plui su le strade di Genova.