Ce fan chest Udinese!

No coventavin masse peraulis par descrivi le impuartance de partide di iêr cuintri le Fiorentina. Si scugnive no sbaliâ e meti vie plui pons possibil, Jè rivade une gran biele vitorie, no scintillante come che cuintri al Napoli –che restarà siguramentri le miôr partide in dût a l’an- ma comunque une gran biele prestazion di dute le squadre, che no à molât un contrast e une corse dal principi a le fin de partide.

Formazion tipo che di De Canio: fûr Di Natale e spazi a Zapata e Thereau. Sousa l’à tignût in panchine tre zujadôrs fondamentai, Borja Valero, Ilicič e Kalinič, par lassâ spazi denant a le zoventüt di Zarate, Bernardeschi, Tello e a l’esperience di Blaszczykowski. Si è capît di subit che al balon al sarès stât controlât de Fiorentine: Le Udinese e veve di sbasâ al ritmo dal zûc, siarasi ben daur e doprâ i cuintri pîs cun velocitât e intensitât par meti in serie dificultât le difese viola.

Nancje doi minûts e le partide si mêt ben pe squadre furlane. Bale in denant, a fâ presion là, in te aree aversarie. Di lì al prin corner. Bale tal mieç e gran goal di Zapata che scomençe il tal miôr mût le prestazion che forsite, si puès dilu, jè stade le sô plui biele in chest an. 1-0 e partide che torne in te direzion che si spietavisi. Le Fiorentine e fâs cori ben le bale, di une bande a che altre dal campo, ma cence creâ pericui a le puarte di Karnezis. Al rive però al goal di Zarate, su di un cross dulà che le difese e fâs al prin e ancje l’ultim dai erôrs de serade. Udinese che in tal prin timp no rive a segnâ un altri goal, cun al balòn che non une, ma ben dos voltis, l’impate cuintri le traviarse de puarte di Tatarusanu.

Le partide no gambìe in tal second timp. Fiorentina che zue, e gire al balon, ma lis ocasions son dutis de Udinese. Brave le squadre di De Canio a doprâ i spazios daur di Alonso e Tello, e pontâ in velocitât le difese cence lassâ al timp a chei altris zujadôrs aversarios di tornâ a difindi. E cussì l’è vignût al goal di Thereau che al’à sierât al discors vitorie. Un goal fât di tre passagjos..bale lungje su Zapata, Kuzmanovic a čholi le prime bale par dopo slargjâ su Widmer, che cun t’un cross biel fuart e bas in tal mieç de aree viola al’à čhatât al pît di Thereau. Buine le partide anche dal nestri monsieur, che al’è in tal plen de sô fase di crescite.

Fiorentina che ancje dopo al goal dal 2-1 à fât simpri al sô zûc, cence dâ le impresion di podè fa mal a Karnezis. Anzi, al risultât al sarès stât plui tarond se Zapata, di bessol denant di Tatarusanu, no vès tirade le bale fûr dal spieli de puarte.

Cun cheste vitorie e lis sconfitis di Frosinone e Palermo, le Udinese fâs un biel pas in te direzion de salvece. Une vitorie e podarà dâ le certeze e sigurece psicologiche, no ancjemò matematiche, di salvasi. Brâv De Canio a drečâ une situazion simpri plui nere pe squadre furlane. Ma brâs i zujadôrs, che no staràn fasint viodi un biel zûc, ma i risultâts son de lôr bande. Le vitorie di iêr jè une vitorie partade čhase grasie a le fan: fan di pons, di salvece, di afiêt de int. Ecco, che fan le Fiorentine no le à vude, le squadre di De Canio sì. Chest si cirive di un pôc di timp, chest si spietisi di viodi ančhe sabide cuintri l’Inter. E alore, cun cheste voe, alc di bon, sabide di sere, in Friûl lu si purtarà.