L'impuartance di clamasi Fofana!

No mi plâs vantami di qualchi personal intuizion; ma une de robis che vevi metût neri su blanc dopo le prestazion cul Pescara ere stade le partide di Fofana, o, par jessi plui precîs, al sô costant percors di crescite, fisiche, tecniche e mentâl. Mi visi di velu viodût pe prime volte in cope Italie, cuintri al Spezia, cheste estât. Par trop che puès contâ une partide di cope Italie zujade in avost, mi visi di un zujadôr che al lassave viodi une grande fisicitât, une presince impuartante a metât campo unide a qualchi strap e progression in denant. E al Fofana che si sta cjapânt spaziis in cheste Udinese l’è un zujadôr che al fâs ben lis robis semplicis. Al partecipe a dutis lis fasis dal zûc, cence però le presunzion di risolvi le situazion con zujadis di campion. Al difind, al attacche, al segne goi che no son banai, come cuintri al Palermo. D'altronde, un passât al Manchester city e une esperience in Ligue 1 vevin di vigni fur, prime o poi.

Un balòn sempliç, passà le bale al compaing che si viôt libar, cori il plui pussibil insieme, judaisi e lâ a fâ mal in cuintri pît. Cheste le prime Udinese di Del Neri dulà che zujadôrs su le vie de maturazion (De Pual, Jankto, Fofana) podin vê le tranquilitât di sbaliâ, di meti in campo chel coragjo che al sta fasind cressi le squadre, cun qualchi biel risultât e ottimis prestazions. E soredût caratàr e personalitât. A Palermo le partide no si ere metude bèn. Tre i gambios di formazion, se cjalìn a le squadre cul Pescara: Angella, prin italian a partì titolâr chest an in te squadre furlane, in difese al puest di Samir cun Felipe spostât a sinistre; Hallfredsson a metât campo cun Jankto a cjapâ flât in panchine; Matos denant al puest di un strâc De Paul. Propite su di un erôr di Angella al Palermo l’à cjatât al goal da l’1-0. Le Udinese da l’an passât varès scomençat a murì sot dal pês di se stesse, a Palermo investe le squadre à cjatât une reazion impuartante, no scontade.

Pur cun lis solitis dificultas cul balon, si sin sburtâs in denant, tant di rivâ cun merit al paregjo di Thereau, al tierç goal in dos partidis, ancje se i miglioraments pe ponte francese posin jessi impuartans (robis che masse furlans no varesin mai pensât al sô prin an a Udin, quanc che al faseve fadie a condividi al ruolo di protagonist cun Di Natale, e ce che al cjatave a fin partide erin i malumôrs de curve nord). Al second timp, cun lis squadris fermis a un paregjo che al Palermo nol podeve par nuje conventà, l’à viodût al solit possès di bale de squadre rosanero (che contarà un 61% a le fin de partide, cuintri al 39% di Del Neri & Co). Ma cheste produzion di zûc à partât mancul tir in te puarte di chei de Udinese, statistichis a le man. Insome, le squadre furlane di è confermade ciniche, triste e brave a cjatà le zuajde juste in tal moment dulà che le partide scugnive svoltasi. 

Al rest l’è storie. Al prin goal di Fofana l’è dome di viodi e tornà a fâ viodi. Goi cussì son zujadis pensadis, no son di ducj. Segnà cussì l’è segno di serenitât e di concentrazion, tant che no mi visi eurogoal dai zujadôrs da l’Udinese in timps recents. Le potence dal tîr, le altece, le angolazion, une esecuzion perfete che à partât le squadre ospite sul 1-2. Si trattave a chel pont di controlà le partide, e di siarale a le iuste ocasion, rivade cheste volte in cuintri pît, cun Fofana che su servizi di Badu l’à mandât cun le complocitât dal purtîr di cjase le bale in te puarte. 1-3 e partide finude: altris tre pons che fasin ben sperà e che segnin lis primis gerarchiis daur, in te zonis cjaldis de clasifiche. 

Cheste Udinese no à nuje a ce spartì, cun dût al rispièt, cun squadris come Empoli, Crotone o Palermo, o, cussì o pensi, chest l’è ce che al mostre al campo. Al starà a Del Neri confermalu, magari al prin veri esamp di lunis, al Friuli, cuintri al no facil aversari che l’è al Torin di Mihajlovič.